Rhaglen ddawns arloesol i atal cwympiadau yw Iechyd Da-wns. Mae’n ymgorffori elfennau allweddol o raglenni atal cwympiadau FaME ac Otago, a ddefnyddir gan hyfforddwyr sefydlogrwydd ystum y corff yn y GIG, gyda dosbarthiadau dawns creadigol. Mae’n ymyriad celfyddydol sy’n seiliedig ar dystiolaeth ym maes gofal iechyd sy’n arwain at lawer llai o gwympiadau a chwympiadau llai difrifol ymhlith y rhai sy’n cymryd rhan.

Bob blwyddyn, bydd traean o bobl dros 65 oed wedi cael cwymp. Gall cwympiadau arwain at anaf difrifol, lleihau hyder i wneud gweithgareddau bob dydd ac arwain at deimlo’n ynysig yn gymdeithasol. Mae torri esgyrn oherwydd cwympiadau yn costio
£4.4 biliwn y flwyddyn i’r system iechyd a gofal cymdeithasol. Mae Iechyd Da-wns yn cynnig ateb pwerus. Profwyd ei fod yn lleihau cwympiadau 58%. Os oes person hŷn yn ymweld â’r adran ddamweiniau ac achosion brys ar ôl cael cwymp, y tebygolrwydd y byddant yn gleifion mewnol yw 35%. Os oes rhywun sy’n cymryd rhan yn Iechyd Da-wns yn ymweld â’r adran ddamweiniau ac achosion brys ar ôl cael cwymp, mae’r ganran yn gostwng i 13%. Mewn gair, mae’n newid bywydau.

Mae Iechyd Da-wns ar gyfer unrhyw oedolyn a allai fod mewn perygl uwch o gael cwymp. Mae hyn yn dueddol o fod yn oedolion dros 50 oed.

Er bod y ‘dawnsio’ yn ein dosbarthiadau yn integreiddio ymarferion i atal cwympiadau, mae’n ffordd o fynegi eich hun yn artistig lawn cymaint. Drwy ymgysylltu ag amrywiaeth o arddulliau dawns, a gyflwynir gan artistiaid dawns proffesiynol sydd wedi’u hyfforddi gan y PSI, mae’r rhai sy’n cymryd rhan yn cael y mwynhad o ymarfer dawns fel celfyddyd.

Rydyn ni’n gweithredu’n genedlaethol. Er bod ein dosbarthiadau wyneb yn wyneb wedi’u cyfyngu i rai ardaloedd, mae gennym gynlluniau i ehangu i bob cwr o’r DU dros y blynyddoedd nesaf.

Mae gan Iechyd Da-wns amrywiaeth o ffrydiau ariannu. Cafodd ein cyfnod arloesi
rhwng 2017-2020 ei ariannu’n bennaf gan grantiau. Roedd y gyllideb yn cynnwys
£2.1 miliwn drwy Gronfa Gymunedol y Loteri Genedlaethol (45%), sefydliadau elusennol (14%), ‘Cronfa Ail Hanner’ Nesta (12%), Cronfa Cyn-filwyr Hŷn (11%) a’r sector iechyd (8%).

Mae pob rhaglen Iechyd Da-wns yn cynnwys dau gam gwahanol, cam gwella, sydd fel arfer yn para 26 wythnos, a cham cynnal, sydd fel arfer yn para 16 wythnos, am gyfanswm o 42 wythnos. Fel arfer mae’r rhain wedi’u gwasgaru dros gyfnod o 12 mis, gan ystyried dyddiadau pwysig fel y Nadolig a’r Flwyddyn Newydd. Gall y rhai sy’n cymryd rhan ymuno yn ystod unrhyw gam o raglen, ond mae’n ddoeth cwblhau rhaglen gyfan.

Gallwch chi weld rhestr gyfoes o grwpiau a’u hardaloedd ar y dudalen hon. Os ydych chi’n amau ​​bod unrhyw un o’r rhestrau’n hen, gallwch chi gysylltu â ni.

Mae ein dosbarthiadau wedi’u cynllunio ar gyfer oedolion yn unig. Ar gyfer y boblogaeth gyffredinol, mae ein dosbarthiadau’n cynnig y budd mwyaf i’r rhai dros 50 oed, ond gall unrhyw un ymuno.

Wrth gwrs! Gorau po fwyaf. Os hoffai eich ffrind gymryd rhan, byddai’n ddoeth ffonio ymlaen llaw i weld os oes llefydd ar gael. Mae manylion ar gyfer gwneud hynny wedi’u cynnwys ar dudalen y grwpiau cyfredol, fan hyn.

Ddim o gwbl! Mae ein dosbarthiadau yn addas i bob lefel o brofiad.

Gallwch chi gofrestru eich diddordeb gyda ni drwy anfon neges atom fan hyn. Gallwch chi hefyd gofrestru i dderbyn ein cylchlythyr e-bost fan hyn i gael y wybodaeth ddiweddaraf am grwpiau newydd, a dilynwch ein tudalen Facebook fan hyn, neu ein cyfrif Twitter fan hyn.

Yn y rhan fwyaf o achosion, cyrff lleol neu ranbarthol sy’n talu am Iechyd Da-wns, sy’n golygu ei fod am ddim i’r rhai sy’n cymryd rhan. Mewn rhai achosion, bydd grwpiau nad oes ganddyn nhw gyllid allanol yn gofyn am gyfraniad bach tuag at dalu’r artist dawns, llogi’r lleoliad a phrynu lluniaeth.

Rydyn ni wastad yn chwilio am help ychwanegol. P’un a ydych chi’n artist dawns, neu os hoffech chi wirfoddoli yn un o’n sesiynau, cysylltwch â ni! Dydyn ni ddim yn rhoi ein cyfeiriadau e-bost fan hyn, er mwyn atal sbamwyr rhag eu defnyddio, ond gallwch chi gysylltu â ni ar ein tudalen gyswllt drwy glicio fan hyn.

Cynhaliodd Prifysgol Sheffield Hallam astudiaeth tair blynedd ar Iechyd Da-wns,
y gallwch ei darllen yn llawn fan hyn. Daeth i’r casgliadau canlynol.

O safbwynt iechyd:

• Nid oes tystiolaeth bod dawns, yn gyffredinol, yn lleihau cwympiadau.
• Serch hynny, mae Iechyd Da-wns yn lleihau’r siawns o gael cwymp 58% ymhlith cyfranogwyr mewn blwyddyn.
• Mae 35% o bobl hŷn sydd wedi gorfod mynd i’r adran ddamweiniau ac achosion brys ar ôl cael cwymp, yn cael eu derbyn fel cleifion mewnol. Ymhlith y rhai sy’n cymryd rhan yn Iechyd Da-wns, mae’r ganran hon yn gostwng i 13%.
• Mae rhaglenni atal cwympiadau traddodiadol wedi’u tystiolaethu’n dda ond yn ddiflas, gan arwain at ostyngiad mewn presenoldeb, ac o ganlyniad, effeithiolrwydd is. Mae Iechyd Da-wns yn datrys y broblem hon.

O safbwynt celfyddydol, mae ein hartistiaid dawns a’r rhai sy’n cymryd rhan yn gallu  tystio i bŵer creadigrwydd yn y dosbarthiadau Iechyd Da-wns. Roedd yn bwysig i ni o’r cychwyn cyntaf nad oedd ein rhaglenni’n tyfu i gyflawni nodau polisi / cymdeithasol / gwleidyddol / economaidd fel blaenoriaeth, ond yn hytrach gweithgareddau sydd â gwerth artistig cynhenid. Diolch i gymorth artistiaid dawns proffesiynol, rydyn ni’n falch o ddweud bod hyn yn parhau i gael ei gyflawni.

Nid yn unig y mae ein holl artistiaid dawns wedi’u hyfforddi fel Hyfforddwyr Sefydlogrwydd Ystum y Corff, sy’n golygu eu bod yn gymwys i drosi’r rhaglenni atal cwympiadau FaME ac Otago, sy’n cael eu cefnogi gan y GIG, yn y dosbarthiadau, ond mae gennym gontractau parhaus gyda sawl corff yn y GIG i gyflwyno Iechyd Da-wns.

Rydyn ni i gyd yn gwybod am bŵer y celfyddydau. Efallai ein bod ni’n meddwl am gân sy’n dod ag atgofion yn ôl, llun sy’n cyffwrdd â rhywbeth na ellir ei ddisgrifio, ffilm, llyfr neu raglen deledu sydd wedi newid y ffordd rydyn ni’n meddwl, neu wedi gadael i ni ddychmygu bydoedd newydd. Yn y bôn, mae gan y celfyddydau y pŵer i siarad â ni,
i gynnal ein diddordeb, i adlewyrchu’r byd yn ôl atom ni, ac i roi ffyrdd newydd o weld i ni.

Ym maes iechyd, mae pwyslais newydd ar ofal sydd wedi’i bersonoleiddio. Yn gynyddol, rhoddir pŵer i unigolion dros y penderfyniadau sy’n effeithio ar eu hiechyd. Mae hyn yn cynnwys dilyn gweithgareddau sy’n ymwneud â gofal ataliol ac adferol. Gall y prosesau sy’n gysylltiedig â gwneud hynny ymddangos yn sych neu’n rhy glinigol yn aml, gan arwain at ddiffyg defnydd neu ymgysylltiad. Gall dulliau sy’n seiliedig ar y celfyddydau ddatrys y broblem hon, gan ddarparu porth creadigol a mynegiannol i arferion iechyd sy’n gwneud gwahaniaeth go iawn i fywydau pobl.